معاكسة بنات

البنات و الشارع




كنت فاكرة ان المراة ممكن تكون نالت جزء ولو معقول من الحرية والأحترام فى المجتمع




لكن بعد كدة انا اتاكد ان المراة مازال بيمارس ضدها العنف و الاضطهاد. وان موضوع حرية المراة اللى نالتها المراة المصرية مجرد كلام نظرى .

وان كانت الحقيقة العملية ان المجتمع مستمر فى احتقار المراة و اعتبرها مجرد (حتة لحمة) مش من حقها انها تعمل اى حاجة غير انها تقعد فى البيت و بالكتير تتعلم و لو فكرت تمشى فى الشارع يبقى (تستلقى وعدها )

و كانهم مستغربين ان البنت تخرج و تشتغل و تمارس حياتها بشكل طبيعى . لانها عار لازم يستخبى و لانها كمان كائن من الطبقة التانية و لو مكنتش اقل من كدة كمان و اكتر حاجة تدل على الكلام دة المعاكسات اللى بنشوفها كل يوم فى الشوارع .

الشباب بيحملو البنات المسئولية و بيقولوا انها هى اللى بتشجعهم بلبسها المغرى، والبنات عايزين يلبسوا على الموضة منهم اللى بتعمل كدة بهدف الاهتمام بنفسها و دة طبعا من حقها و دى حرية شخصية .

و منهم اللى بيحبوا يتعكسوا و دول طبعا فئة بسيطة . لكن الرد على كلام الشباب ان ادعائهم خطأ وان دى مجرد حجة بس احب افكرهم ان مفيش حاجة تبرر المعصية و ان ربنا امرهم بغض البصر يعنى لو حتى فى بنات مغريات مش من حقهم انهم ينتهكوا كرامتهم و احساسهم بالامان .

والى يدل على ان المعاكسة بقت داء عند الشباب وانه ملوش مبررات غير ان الشباب فاضى و هايف و منساق لاهواءه وغرائزه الحيوانية ، ان فى منقبات بيتعكسوا و بنات محترمات جدا بتتعاكس وستات فى الاربعينيات بتتعاكس و طالبات بلبس المدرسة بتتعاكس .


كمان اللى ياكد ان الشباب مش واقع تحت ضغوط زى مبيدعى ان فى شباب كتير بتنزل على النواصى والمولات او يخدوا العربية يلفوا بيها فى الشوارع عشان يعاكسوا و كاننا فى سوق الحريم . يعنى الموضوع مش تحت بند الصدفة و لا الضغط .

اما البنات الهايفة المستهترة اللى بتخرج عشان تتعاكس مش عارفيين هما اد ايه بيقللوا من قيمتهم و بيعرضوا نفسهم بشكل رخيص زى الجوارى .

يا جماعة المعاكسة بقت شىء عادى جدا فى الشوارع وبقت المعاكسة مرض عند معظم الرجالة و بقت كمان دليل على الروشنة و الرجولة لحد موصلنا لدرجة ان المعاكسات بقت سمة من سمات شوارعنا .

لدرجة كمان ان الطفل من سن 10 سنين لحد راجل كبير يصل ل50 سنة بيعاكسوا .

كنت فاكرة ان المراة ممكن تكون نالت جزء و لو معقول من الحرية والاحترام فى المجتمع . لكن بعد كدة اتاكدت ان المراة مازال بيمارس ضدها العنف و الاضطهاد . و ان موضوع حرية المراة اللى نالتها المراة المصرية مجرد كلام نظرى